Möhsin Paknejad 15 oktyabr çərşənbə axşamı günortadan sonra Azərbaycan Respublikası Baş nazirinin müavini Şahin Mustafayev ilə görüşündə iki ölkə arasında çoxlu mədəni, tarixi və milli ortaqlıqların olduğunu və bunun iki xalqı bir-birinə daha da yaxınlaşdırdığını bildirərək deyib: “İran İslam Respublikasının xarici siyasətində qonşulara xüsusi üstünlük verilir. Bu arada Azərbaycan Respublikasının da xüsusi yeri vardır. Ona görə də ümid edirəm ki, 14-cü hökumətdə biz iki ölkə arasında əməkdaşlığın yaxşılaşdığını görəcəyik.”
Paknejad neft və energetika sektorunun Azərbaycan Respublikası ilə iqtisadi əlaqələrin inkişaf oxlarından biri olduğunu bəyan edərək deyib: “Bu kontekstdə biz Azərbaycan Respublikasının əməkdaşlıq səviyyəsinin yüksəldilməsi üçün təklif etdiyi hər hansı təşəbbüsü alqışlayırıq. İki ölkə arasında enerji sahəsində əməkdaşlığın inkişafı və artırılması zəruridir və zəruri infrastruktur tələb edir.”
Neft naziri enerji sahəsində əməkdaşlığın inkişafının sürətləndirilməsi məqsədi ilə iki ölkənin birgə işçi qrupunun yaradılmasını vurğulayıb, bu işçi qrupunun yaradılması və fəaliyyətinin izlənilməsini Neft Nazirliyinin beynəlxalq və kommersiya məsələləri üzrə müavininə həvalə edib.
Görüşün davamında Azərbaycan Respublikası Baş nazirinin müavini Neft nazirini bu vəzifəyə seçilməsi münasibətilə təbrik edərək deyib: “Hazırda İranla Azərbaycan Respublikası arasında qədim köklərə söykənən geniş əlaqələr mövcuddur. İrana səfərimizin məqsədi iki ölkə arasındakı əlaqələri nəzərdən keçirmək və gələcək layihələrin həyata keçirilməsi üçün danışıqlar aparmaqdır.”
Şahin Mustafayev Prezident Məsud Pezeşkiyanla dünənki (bazar ertəsi) görüşünə toxunaraq deyib: “O, İran və Azərbaycan Respublikası arasında əlaqələrin inkişafında maraqlıdır. Həmçinin Azərbaycan Respublikasının Prezidenti İlham Əliyev İranla qarşılıqlı əlaqələrə böyük önəm verir, hazırda icra edilən və gələcək layihələrin həyata keçirilməsinə sadiq olduğunu bəyan edib.”
Sizin rəyiniz